nigah-e-yar ham se aaj be-taqsir phirti hai
kisi ki kuchh nahin chalti hai jab taqdir phirti hai
muraqqaa hai miri ankhon men kya yaran-e-rafta ka
jo nazron ke tale har ek ki tasvir phirti hai
tira divana jab se uth gaya sahra-e-vahshat se
bagule ki tarah se dhundhti zanjir phirti hai
tiri talvar ka munh ham se phir jaae to phir jaae
hamari aankh kab qatil tah-e-shamshir phirti hai
kabhi to khinch laegi use gor-e-ghariban par
ki muddat se hamari khaak daman-gir phirti hai
bayan kis munh se hoe yaar ki shirin-kalami ka
zaban par apni ab tak lazzat-e-taqrir phirti hai
maqam-e-ishq men shah-o-gada ka ek rutba hai
zulekha har gali-kuche men be-tauqir phirti hai
firaqe-e-gul men itna tu abas nalan o muztar hai
bahar-e-rafta phir ai bulbul-e-dil-gir phirti hai
dar-e-bab-e-asar tak ek din jaate nahin dekha
khuda jaane kahan ye ah-e-be-tasir phirti hai
khuda shahid hai is ka phir nahin milti nahin milti
tabiat apni jis se o but-e-be-pir phirti hai
ham us laila ko divane hain ai ‘ghafil’ jo sahra men
baghal men apne majnun ki liye tasvir phirti hai
Leave a Reply