agahi maut se kam bhi nahin rusva bhi nahin
dekhta huun vo tamasha jo tamasha bhi nahin
jalva mushtaq bhi huun jalva taqaza bhi nahin
husn majruh-e-nazar ho ye gavara bhi nahin
zindagi ham ko bahut der men raas aa.i hai
dard kam bhi nahin imkan-e-mudava bhi nahin
raah paata hai zamana miri gumrahi se
manzilen kya mire aage koi rasta bhi nahin
ba.az vaqton ke ḳhayalat bhi kya hote hain
duur tak jaise main tanha bhi huun tanha bhi nahin
sabiqa aise sitamgar se hai din raat apna
ya.ani qatil bhi nahin vo to masiha bhi nahin
raushni milti hai duniya ko unhi logon se
jin ke hisse men charaghon ka ujala bhi nahin
apne hi shahr men ab apne shanasa kam hain
dasht-e-ghurbat men ajab kya jo shanasa bhi nahin
har tabahi ka sabab hai dil-e-muztar tanha
gham hazar afat-e-jan hai magar itna bhi nahin
haq rifaqat ka ada kar diya shayad us ne
dil gulistan bhi nahin dard ka sahra bhi nahin
mashvare dete hain ahbab mujhe ‘shauq’ aise
jaise ab tak mujhe andaza ḳhud apna bhi nahin
Leave a Reply