be-qarari dil-e-muztar ki baḌha.i ham ne
aaj phir tum se koi aas laga.i ham ne
mushkilen rah-e-vafa men bhi bana.in asan
rasm-e-ulfat to ba-har-taur nibha.i ham ne
shayad aa jaao kisi roz kabhi lauT ke tum
bas usi aas men har raah saja.i ham ne
tum kabhi the na hamare na kabhi hoge sanam
ye samajhne men bahut der laga.i ham ne
haa.e dilkash vo ada.en dil-avez nazar
jin men uljhe rahe aur umr ganva.i ham ne
koi shikva na shikayat na gila hai tum se
apne hi haath se hasti bhi miTa.i ham ne
rahne vaale hain ‘saba’ arsh-e-barin ke vo to
kahkashan phir bhi sar-e-farsh bicha.i ham ne
Leave a Reply