duur kyuun ja.un yahin jalva-numa baiTha hai
dil mira arsh hai aur us pe ḳhuda baiTha hai
but-kade men tire jalve ne tarashe patthar
jis ne dekha yahi jaana ki ḳhuda baiTha hai
kya hue aankh ke parde jo paḌe the ab tak
barmala hashr men kyuun aaj ḳhuda baiTha hai
naqsh-e-vahdat hi suvaida ko kaha karte hain
dil men ik til hai aur us til men ḳhuda baiTha hai
main jo kahta huun ki ka.abe ko na barbad karo
hans ke but kahte hain kya dil men ḳhuda baiTha hai
asman main tiri gardish se nahin Darta huun
tujh ko kis baat ka gham sar pe ḳhuda baiTha hai
chashm-e-vahdat se jo insan zara ghaur kare
jis ko dekhe yahi samjhe ki ḳhuda baiTha hai
apne marne ka zara gham na karo tum ‘muztar’
yuun samajh lo ki jilane ko ḳhuda baiTha hai
Leave a Reply