allah ai buto hamen dikhlae lucknow
sote men bhi ye kahte hain ham haae lucknow
aisa hua huun hijr men us ke nahif-o-zar
dekhe agar mujhe vahin sharmae lucknow
aae na mere paas to main aap hi chalun
mujh ko khuda kare kahin bulvae lucknow
kalkatta ke hasinon ko jab dekh leta huun
us vaqt dil men hota hai sauda-e-lucknow
ab lut gaya hai kya raha dozakh se badh ke hai
rashk-e-bahisht kahte the sab ja-e-lucknow
khush-chashmi ahuon ki vo bhule jahan men
dekhe jo aankh nargis-e-shahla-e-lucknow
gulshan ajab bahar ke har qasr rashk-e-khuld
aur gomti ghazab ki hai dariya-e-lucknow
hur-o-pari ko rashk tha ik ek shakhs par
be-misl the sabhi mah-e-sima-e-lucknow
marne ke baad bhi na mitega jigar se daagh
jannat men ham ko hoegi parva-e-lucknow
jab se hata hai vo tah-o-bala ye ho gaya
jannat koi zarur tha bala-e-lucknow
main kya kahun faqiron ko jo kuchh ghurur tha
ik ik gada-e-shahr tha dara-e-lucknow
hatta nahin tasavvur-e-asbab-o-mulk-o-mal
kanon men baj rahi hai vo shahna-e-lucknow
kya kya hasin the jama paristan ka takhta tha
nazron men phirte hain rukh-e-zeba-e-lucknow
shahon pe fakhr karte the is mulk ke gada
tha misl-e-jam-e-jam mai-o-mina-e-lucknow
har-chand laakh tarah bhulata huun yaad ko
‘akhtar’ pukar uthta hai dil haae lucknow
Leave a Reply