rafiq-o-monis-o-hamdam koi mila hi nahin
vo kya jiye jise jiine ka aasra hi nahin
use haqiqat-e-uzma samajh ke itra.e
vo naqsh-e-zist jo sach puchhiye bana hi nahin
ḳhuda ke vaste kuchh raushni ghaTa diije
nazar hai ḳhira kuchh aisi ki sujhta hi nahin
havas-o-hosh-o-ḳhirad sab vahan salamat hain
jahan nigah ka jaadu kabhi chala hi nahin
vo apni zaat se bahar nikal ke kya jaa.e
vo dida-var jo kisi samt dekhta hi nahin
tiri nigah ke sadqe tiri nazar ke nisar
gira jo teri nazar se vo phir uTha hi nahin
us ek baat ke qurban ja.iye ki jise
tamam umr kaha aur kuchh kaha hi nahin
fasana-e-dil-e-sad-chak ka ma.aal na puchh
suna to us ne magar jaise kuchh suna hi nahin
dikha.un bhi to kise dard-o-ranj ki tasvir
mire jahan men koi dard-ashna hi nahin
mire rafiq mujhe dars-e-maslahat kyon den
dilon ki baat hai yaan maslahat rava hi nahin
zamana us se ḳhushi kyon talab kare ‘qadir’
jise ghamon ke siva aur kuchh mila hi nahin
Leave a Reply