Sajid Sajni
shabab us ka tha ik itr-dan ki ḳhushbu
sameT laaya tha saare jahan ki ḳhushbu
baḌhi jo umr to halat ne bhi ruḳh moḌa
ab un se aane lagi daada jaan ki ḳhushbu
jo ik khanDar hai hamari gali ke nukkaḌ par
vahan se aati hai ik ḳhandan ki ḳhushbu
ye raaz main na samajh paa.i aaj tak bhabi
ki tum se aati hai kyon bhaa.i jaan ki ḳhushbu
lipaT ke so ga.i kal raat un ke siine se
bhali kuchh aisi lagi ammi jaan ki ḳhushbu
jidhar bhi jaati huun chehre hain jhurriyon vaale
kahin se aati nahin naujavan ki ḳhushbu
Leave a Reply