Syed Amin Ashraf
bagh-o-bustan hue viran ki ji janta hai
sar-e-duniya hai vo tufan ki ji janta hai
aur kya us ke siva hasil rudad-e-jahan
ḳhak-o-ḳhun dast-o-gareban ki ji janta hai
roz-e-mahshar to na tha sham-e-mulaqat thi vo
yuun hue be-sar-o-saman ki ji janta hai
mah-timsal tha ya ḳhanjar-e-uryan koi
yuun hai paivast-e-rag-e-jan ki ji janta hai
dard hota to sar-e-sham sambhal bhi jaata
dil hai vo lashkar-e-arman ki ji janta hai
be-sukuni ki talab hai nasha-e-qulzum-e-jan
aab hai tishna-e-haijan ki ji janta hai
tai kahan hoti hai rah-e-safar-e-na-ma.alum
gham hai yuun dida-e-hairan ki ji janta hai
Leave a Reply