Ayaz Rasool Nazki
andheri raat nauhe ga rahi hai
ḳhamoshi shahr bhar men chha rahi hai
zamin par ḳhuun itna bah gaya hai
havaon men bhi ḳhushbu aa rahi hai
hari vaadi ka afsun TuTta hai
ḳhizan kuchh rang vo dikhla rahi hai
ka.i lashon ki faslen kaT chuki hain
ki dharti ḳhuun men nahla rahi hai
gharon men shor bhi ab tham gaya hai
gali se fauj bhi ab ja rahi hai
Leave a Reply