Midhat Ul Akhtar
tishnagi apni bujhane ke liye jab ga.e hain
dasht bechare samundar ke tale dab ga.e hain
kuuch karne ki ghaḌi hai magar ai ham-safro
ham udhar ja nahin sakte jidhar sab ga.e hain
ghair shaista-e-adab-e-mohabbat na sahi
ham tire hijr ke azar men mar kab ga.e hain
ab koi aks hai salim na kisi ka chehra
a.ina-ḳhane men kya dekhne sahab ga.e hain
koi rasta na mila ghar se nikal kar ham ko
ham usi ku-e-malamat ko ga.e jab ga.e hain
teri auqat hi kya ‘mid.hat-ul-aḳhtar’ sun le
shahr ke shahr zaminon ke tale dab ga.e hain
Leave a Reply