ranj-o-alam se mohabbat hai
sa.i-e-nakam se mohabbat hai
zindagi-bhar na ho sahar jis ki
ham ko us shaam se mohabbat hai
kya ḳhatar gardish-e-falak se hamen
gardish-e-jam se mohabbat hai
baada sahba sharab se darad
aise har naam se mohabbat hai
bada-o-jam se mohabbat thi
bada-o-jam se mohabbat hai
har ghaḌi dil men yaad hai un ki
bas usi naam se mohabbat hai
un men shan-e-ḳhuda hai jalva-fagan
ham ko asnam se mohabbat hai
dushman-e-jan hai ye mohabbat bhi
said ko daam se mohabbat hai
qadr-e-isar kya vo samjhenge
jin ko anjam se mohabbat hai
us ki tashrih kya ho ai ‘sahir’
dard-e-be-nam se mohabbat hai
Leave a Reply