Raziya Subhan
hava chali to bahut der tak ruki hi nahin
tumhari yaad ki jaise kabhi thami hi nahin
sama.aton men miri gunjti rahi har dam
vo ek baat jo us ne kabhi kahi hi nahin
na jaane kis liye us ka hi intizar raha
vo ek shaḳhs ki jis se kabhi mili hi nahin
hava ne jab bhi uḌaya ga.i falak ki taraf
ajiib ḳhaak thi jo ḳhaak men mili hi nahin
kabhi laga ki bahut tez-rau rahe lamhe
kabhi laga ka.i sadiyon se main chali hi nahin
kali bhi dil men mohabbat ki ik hansi thi magar
kabhi vo bagh-e-tamanna men to khili hi nahin
main ik safir huun ‘raziya’ gudaz lahjon ki
ḳhafa kisi se kabhi der tak rahi hi nahin
Leave a Reply