Sahir Hoshiyarpuri
be-tarah dil ḳhushi se Darta hai
kaun itna kisi se Darta hai
uf re nairangiyan zamane ki
aadmi aadmi se Darta hai
dushmani hi na ho ma.aal us ka
dil tiri dosti se Darta hai
ye bhi hai ik ta.alluq-e-ḳhatir
kaun varna kisi se Darta hai
manzilen gard ban ga.iin phir bhi
rahnuma rahbari se Darta hai
ishq farma-rava-e-haft-aflak
aap ki barhami se Darta hai
jab se vo be-vafa hue ‘sahir’
dil mira har kisi se Darta hai
Leave a Reply