ba-tarz-e-dilbari be-dad kiije
jafaon men ada ijad kiije
hamari ajizi eajaz ho jaae
payambar huun agar azad kiije
ye kaisa alam-e-bala ka jhagda
aji pahlu mira abad kiije
lahu mal kar shahidon men mile hain
hamare naam par bhi saad kiije
tamanna badh na jaae had se zaaed
hamen shah-e-najaf ab yaad kiije
hamari khaak se sahra bhare hain
jahan tak chahiye barbad kiije
isharon ne to le li jaan sahib
zara munh se bhi kuchh irshad kiije
pareshan hai bahut ‘anjum’ khudara
shahid-e-karbala imdad kiije
mizaj-e-yar ho jaae na barham
na ai ‘anjum’ bahut fariyad kiije
Leave a Reply