vo barq ka ho ki maujon ke pech-o-tab ka rang
juda hai sab se mire dil ke iztirab ka rang
shaguftagi mujhe zaḳhm-e-jigar ki yaad aa.i
chaman men dekh ke khilte hue gulab ka rang
kiya na tark agar tark-e-ashiqi ka ḳhayal
ḳharab aur bhi hoga dil-e-ḳharab ka rang
laga rahe hain vo nashtar se zaḳhm par marham
nigah-e-lutf-e-karam men bhi hai itaab ka rang
ye mai-kada to hai ḳhud inqalab ki duniya
yahan jamega na duniya ke inqalab ka rang
havadason se jamal-e-ruḳh-e-hayat hai yuun
qarib shaam ho jis tarah aftab ka rang
dil-e-tabah ka ‘fazil’ ḳhuda hi hafiz hai
ki ab hai aur hi kuchh dard-o-iztirab ka rang
Leave a Reply