lafz ki buhtat itni naqd o fan men aa ga.i
masḳh ho kar surat-e-ma.ani suḳhan men aa ga.i
nisf ankhen khol kar hi us ne dekha tha mujhe
chalne phirne ki sakat mafluj tan men aa ga.i
ab na vo ahbab zinda hain na rasm-ul-ḳhat vahan
ruuTh kar urdu to dehli se dakan men aa ga.i
us ke chehre ka mujhe mardana-pan achchha laga
chashni namkin si saare badan men aa ga.i
kyuun sapera-pan tire nainon men paida ho gaya
is qadar shoḳhi kidhar se bankpan men aa ga.i
ek bosa honT par phaila tabassum ban gaya
jo hararat thi miri us ke badan men aa ga.i
ek vahshi sinf se ham ne sharafat siikh li
panj-tan ki lau ghazal ki anjuman men aa ga.i
ḳhuld ki tasvir ‘kavish’ hu-ba-hu kashmir thi
laash us ki pairahan se ḳhud kafan men aa ga.i
Leave a Reply