Sufi

Rakhi Hai Husn Pe Buniyaad-e-Ashiqi Maine

rakhi hai husn pe buniyad-e-ashiqi main ne

khushi se maut ko de di hai zindagi main ne

kiya kabhi na siva tere ghair ko sajda

kharab-e-shirk na ki rasm-e-bandagi main ne

khudai mil gai sarkar-e-ishq se mujh ko

khudi ke badle talab ki jo be-khudi main ne

chhalakta saghar-e-mai pi ke chashm-e-saqi se

sikhai saare zamana ko mai-kashi main ne

bahar-e-gor-e-ghariban na kyon lahad ho miri

ki jama ki hai zamane ki bekasi main ne

badal ke rang Darae na asman mujh ko

mizaj-e-yar ki dekhi hai barhami main ne

bata ke aib-o-hunar sher-goi ke ‘afqar’

sikhai apne harifon ko shairi main ne

More Poems

Leave a Comment