Farrukh Zohra Gilani
charon janib mausam-e-gul hai pagal yaden tanha.i
man sagar men jaag uThi hain guzri raten tanha.i
main sochon ki jhiil kinare aas jazire dekh rahi huun
sarkash maujen harf gharaunde meri ghazlen tanha.i
tu utre zaḳhmi suraj ki kirnon ko tasvir kare
main lafzon men bandh rahi huun saari shamen tanha.i
dast-e-saba ne phir se mere daman men mahka di hain
chaTki kaliyan bhini ḳhushbu teri baten tanha.i
ab bhi teri yadon men misl-e-charaghan raushan raushan
saath nibhane ki vo teri saari qasmen tanha.i
shayad ‘farruḳh’ in chiḌiyon ki qismat men hi likha hai
buḌha bargad Dhalte saa.e phaili shaḳhen tanha.i
Leave a Reply