Shauq Mahri
hasrat-e-zohra-vashan sarv-qadan hai ki jo thi
apna sarmaya-e-dil yad-e-butan hai ki jo thi
kaj-kulahon se bhi sharminda na hone paa.e
ham men vo jur.at-e-iz.har-e-bayan hai ki jo thi
vaz.a-dari men koi farq na aaya sar-e-mu
vahi avargi-e-ku-e-butan hai ki jo thi
main ne sarmaya-e-dil nazr-e-butan kar Daala
mere naseh ko magar fikr-e-ziyan hai ki jo thi
meri ashufta-mizaji miri shorida-sari
ab bhi maqbul-e-hasinan-e-jahan hai ki jo thi
‘shauq’ taqdir ne karvaT bhi na badli ab tak
zindagi ab bhi vahi sang-e-garan hai ki jo thi
Leave a Reply