Zuhoor Ul Islam Javed
phir sar-e-dar-e-vafa rasm ye Daali jaa.e
gul ho ik sham.a to ik aur jala li jaa.e
duur karni ho jo tariki-e-rah-e-iḳhlas
mash.al-ashk-e-nadamat hi jala li jaa.e
aa.ina main ne sar-e-rahguzar rakha hai
taaki ahbab ki kuchh ḳham-ḳhayali jaa.e
haal ye tark-e-ta.alluq pe hua karta hai
jaise machhli koi paani se nikali jaa.e
tu ise apni tamannaon men shamil kar le
ham se to teri tamanna na sambhali jaa.e
aap ke uThne pe mahfil ka ye aalam paaya
jaise hanste hue chehron se bahali jaa.e
ḳhastagi dekhi hai ‘javed’ fasil-e-dil ki
is pe buniyad shab-e-gham ki na Daali jaa.e
Leave a Reply