dil sulagta hai na ab yaad koi aati hai
gard si hai jo ḳhayalon pe jami jaati hai
duur peḌon se ulajhti hai har andhi lekin
zard patton ko mire ghar men uTha laati hai
karne aati hai munavvar dil har gosha-e-dard
chandni shahar ki galiyon men bhaTak jaati hai
dil ka barbad jahan jab bhi kabhi dekhta huun
apne nakam iradon pe hansi aati hai
vo hai kis des men kis shahr men huun main ‘jamshed’
bas isi soch men har raat guzar jaati hai
Leave a Reply