Arzoo Lakhnavi
dil mukaddar hai a.ina-ru ka
na mila rang se pata bu ka
hai dam-e-sub.h vo ḳhumarin aankh
ek TuuTa tilism jaadu ka
kam jo Thahre jafa se meri vafa
to ye pasang hai tarazu ka
dil ki bechainiyan ḳhuda ki panah
takiya haT haT gaya hai pahlu ka
kahin jaati bahar rukti hai
daman aaya na haath men bu ka
hai na.i qaid ab ye azadi
zor TuuTa hua hai baazu ka
andhi aahon ki sail ashkon ki
ab nahin koi apne qaabu ka
qahqaha bharti hai surahi kya
zarf ḳhum se siva hai chullu ka
soti qismat ki niind uḌavega
narm takiya kisi ke zaanu ka
ishq-bazi hai jaan ki jokham
vahin maara paḌa jahan chuka
‘arzu’ dil hai vaqf-e-bim-o-umid
jhilmilata charagh jugnu ka
Leave a Reply