Kabhi Tum Bhigne Aana Meri Aankhon Ke Mausam Mein

kabhi tum bhigne aana miri ankhon ke mausam men

banana mujh ko divana miri ankhon ke mausam men

barasta bhigta ho jab koi lamha nigahon men

vahin tum bhi thahar jaana miri ankhon ke mausam men

kai mausam guzare hain unhon ne dhuup chhanv ke

naya mausam koi laana miri ankhon ke mausam men

sunahri dhuup phaili ho kahin yadon ke jangal men

to kirnen ban ke muskana miri ankhon ke mausam men

kabhi do-char ho jaaen miri nazren jo tum se to

chhalak jaega paimana miri ankhon ke mausam men

miri ankhon ke sab mausam hain tanhai se ghabrae

na tanha chhod kar jaana miri ankhon ke mausam men

hain yuun to fasle kitne zamanon ke makanon ke

magar milte ho rozana miri ankhon ke mausam men

Leave a Comment