shagufta bachchon ka chehra dikha.i dene lage
main kya karun ki ujala dikha.i dene lage
ye saḳht zulm hai malik ki sub.h hote hi
tamam ghar men andhera dikha.i dene lage
vo sirf main huun jo sau jannaten saja kar bhi
udaas udaas sa tanha dikha.i dene lage
main kamyab jabhi hunga ai rubab-e-hayat
ki bazm ko tira naghma dikha.i dene lage
gulab ugane ki aadat se fa.eda kya hai
agar gulab men sho.ala dikha.i dene lage
mira hi aks sahi phir bhi vo farishta hai
jo ghair ho ke bhi apna dikha.i dene lage
bahut aliil ho lekin ye buz-dili hai ‘salam’
ki tum ko maut ka saaya dikha.i dene lage
Leave a Reply