kya jurm hamara hai bata kyuun nahin dete
mujrim hain agar ham to saza kyuun nahin dete
kya jalva-e-ma.ani hai dikha kyuun nahin dete
divar-e-hijabat gira kyuun nahin dete
tum ko to baḌa naz-e-masiha.i tha yaaro
bimar hai har shaḳhs dava kyuun nahin dete
kis dasht men gum ho ga.e ahbab hamare
ham kaan laga.e hain sada kyuun nahin dete
kam-zarf hain jo pi ke bahut ke hain sar-e-bazm
mahfil se unhen aap uTha kyuun nahin dete
kyuun haath men larza hai tumhen ḳhauf hai kis ka
ham harf-e-ghalat hain to miTa kyuun nahin dete
kuchh log abhi ishq men gustaḳh bahut hain
adab-e-vafa un ko sikha kyuun nahin dete
naghma vahi naghma hai utar jaa.e jo dil men
duniya ko ‘hafiz’ aap bata kyuun nahin dete
Leave a Reply