sitare so ga.e to asman kaisa lagega
jahan-e-tirgi men ye jahan kaisa lagega
bichhaḌ ke sahilon se mauj-e-dil kaisi lagegi
bikhar ke andhiyon men badban kaisa lagega
Thahar ja.engi jab ye kashtiyan kaisi lagengi
guzar ja.ega jab ab-e-ravan kaisa lagega
imarat Dhah chuki hogi jo sansen TuTne se
to phir vo saya-e-divar-e-jan kaisa lagega
utar ja.ega rang-e-ashiqi jab is ke ḳhuun se
to dil begana-e-sud-o-ziyan kaisa lagega
qafas kaisa lagega uḌ ga.e jab gaate panchhi
na hoga jab koi shor o fughan kaisa lagega
bikhar ja.engi zanjiren sabhi zindaniyon ki
zaval-e-naḳhvat-e-na-mehrban kaisa lagega
bahut ranginiyan hongi agarche rah men lekin
musafir kho gaya to karvan kaisa lagega
jahan tum se bahut pahle pahunch ja.enge ham log
na jaane aḳhiri vo ḳhak-dan kaisa lagega
Leave a Reply