duur hai manzil to kya rasta to hai
ik nazar us ne mujhe dekha to hai
chand hathon men nahin to kya hua
asman par hi sahi dikhta to hai
khush agar ghairon men hai to khush rahe
vo kahin bhi ho chalo achchha to hai
kuchh nahin hai aur to gham hi sahi
is bhari duniya men kuchh apna to hai
aaj vo yuun hi nahin mujh se khafa
kuchh gila to hai koi shikva to hai
kiya bharosa us ke vaade ka magar
dil ke khush rakhne ko ik vaada to hai
us ne rakkha hai takalluf ka bharam
ab adavat par koi parda to hai
aa raha hai vo bhi akhir raah par
sun ke mera zikr kuchh kahta to hai
dil nahin ‘azim’ chalo jaan hi sahi
khair us ne mujh se kuchh manga to hai