ek ik lamhe ko palkon pe sajata hua ghar
raas aata hai kise hijr manata hua ghar
khvab ke khadshe se ab niind udi jaati hai
main ne dekha hai use chhod ke jaata hua ghar
gar zaban hoti to patthar hi batata sab ko
kis qadar tuuta hai vo khud ko banata hua ghar
us ka ab zikr na kar chhod ke jaane vaale
tu ne dekha hi kahan ashk bahata hua ghar
ab use yaad kahun yaas kahun ya vahshat
mujh ko aata hai nazar khaak udata hua ghar
thak gaya kya mire tulani safar se ‘adil’
so gaya saath mire mujh ko sulata hua ghar
Leave a Reply