Dekh Bhaal Kar Sambhal Sambhal Kar Aate Hain

Fani Jodhpuri

dekh bhaal kar sambhal sambhal kar aate hain

ham tak chehre umr badal kar aate hain

jame hain jo chehre ankhon ki koron pe

aao un ko giit ghazal kar aate hain

jab kirnen paani pe dastak deti hain

lahron pe girdab uchhal kar aate hain

tum jaise ham lagne lagenge Thahro to

ham bhi apna ḳhuun badal kar aate hain

gulshan se mujh tak aane men hava ke haath

jaane kitne phuul masal kar aate hain

‘fani’ jaise kuchh chehre bazaron men

apni ana har roz nigal kar aate hain