Faragh Rohvi
labon ke samne ḳhali gilass rakhte hain
samundaron se kaho ham bhi pyaas rakhte hain
har ek gaam pe raushan hua ḳhuda ka guman
isi guman pe yaqin ki asaas rakhte hain
ham apne aap se paate hain koson duur use
vahi ḳhuda ki jise as-pas rakhte hain
chaḌha ke dar-e-qana.at pe har tamanna ko
jo ek dil hai use bhi udaas rakhte hain
ziyan-pasand hamara mizaj hai varna
nigah ham bhi zamana-shanas rakhte hain
hamare tan pe koi qimti qaba na sahi
ghazal ko apni magar ḳhush-libas rakhte hain
chalo ki rah-e-tamanna men chal ke ham bhi ‘faragh’
zamin-e-dil pe ghamon ki asaas rakhte hain
Leave a Reply