pi li to kuchh pata na chala vo surur tha
vo us ka saaya tha ki vahi rashk-e-hur tha
kal main ne us ko dekha to dekha nahin gaya
mujh se bichhaḌ ke vo bhi bahut gham se chuur tha
roya tha kaun kaun mujhe kuchh ḳhabar nahin
main us ghaḌi vatan se ka.i miil duur tha
sham-e-firaq aa.i to dil Dubne laga
ham ko bhi apne aap pe kitna ghurur tha
chehra tha ya sada thi kisi bhuli yaad ki
ankhen thiin us ki yaaro ki dariya-e-nur tha
nikla jo chand aa.i mahak tez si ‘munir’
mere siva bhi baagh men koi zarur tha
Leave a Reply