Rahi Shahabi
nakam meri koshish-e-zabt-e-alam nahin
yuun mutma.in huun jaise mujhe koi gham nahin
tarikiyon men aaj bhi gum hai vo rahguzar
jis ko nasib aap ke naqsh-e-qadam nahin
is daur men ki jis men hai jins-e-vafa ka qaht
ham se vafa-shi.ar jo baaqi hain kam nahin
tere siva kisi se ujalon ki bhiik le
kam-zarf is qadar to miri sham-e-gham nahin
bikhre hue se ‘rahi’ ye auraq-e-zindagi
apni hayat zulf-e-pareshan se kam nahin
Leave a Reply