Riyaz Latif
sab ḳhalaon ko ḳhalaon se bhigo sakta hai
aadmi ruuh ke andar bhi to ro sakta hai
ye siyahi ka sira jaane kahan haath aa.e
mira saaya tira batin bhi to ho sakta hai
dastaras tere samundar ki hai tujh se bhi pare
tu mujhe aankh se bahar bhi Dubo sakta hai
le to aaya hai mujhe maut ki gardish se alag
tu mujhe saans ke mahvar pe bhi kho sakta hai
apne anfas ki tahrik pe bikhra hai magar
tu mere lams men yakja bhi to ho sakta hai
teri miTTi ne samoya nahin to kya hai ‘riyaz’
tu to is jism ke bahar kahin so sakta hai
Leave a Reply