achchhi guzar rahi hai dil-e-khud-kafil se
langar se roti lete hain paani sabil se
duniya ka koi daagh mire dil ko kya lage
manga na ik diram bhi kabhi is bakhil se
kya boriya-nashin ko havas taaj o takht ki
kya khak-ashna ko gharaz asp o fiil se
dil ki taraf se ham kabhi ghafil nahin rahe
karte hain pasbani-e-shahr us fasil se
gahvara-e-safar men khuli hai hamari aankh
taamir apne ghar ki hui sang-e-mil se
ik shakhs badshah to ik shakhs hai vazir
goya nahin hain donon hamari qabil se
duniya mire pados men abad hai magar
meri dua-salam nahin us zalil se
‘javed’ ek gham ke siva dil men hai bhi kya
ham ghar chala rahe hain mata-e-qalil se
Leave a Reply