kivaḌ band bhi hai aur nim-va bhi hai
vo ruup anuup zara ḳhush zara ḳhafa bhi hai
sharik-e-rah-e-vafa gul-sarisht mah-ba-kaf
qatil-e-gardish-e-dauran barahna-pa bhi hai
haqiqaton se fasanon ko kya ilaqa hai
ḳhuda nahin bhi hai logo magar ḳhuda bhi hai
hujum-e-naghma-o-nik.hat men yuun to hota hai
ḳhata muaaf ḳhata to nahin ḳhata bhi hai
vahi ghazal ki rivayat-e-kafiri hain abhi
vahi hijab vahi shoḳhi-e-ada bhi hai
ufuq ufuq abhi insan ki manzilen hain ‘vaqar’
usi zamin pe magar rah-e-irtiqa bhi hai
Leave a Reply