Qamar Jalalvi
tum apni yaad se kah do na jaa.e chhoḌ ke dil
ki dard-e-hijr na rakh de kahin maroḌ ke dil
ab aap ke mire ghar tak qadam nahin aate
ye vo saza hai diya tha jo haath joḌ ke dil
ḳhuda rakhe abhi kamsin ho qadr kya jaano
zara si der men rakh doge toḌ-phoḌ ke dil
liya tha jaise usi tarah pher bhi dete
ye kya ki phenk diya tum ne munh sikoḌ ke dil
hamare saath na dekhi bahar taron ki
‘qamar’ chale ga.e vo chandni men toḌ ke dil
Leave a Reply