Iman Ki Laghzish Ka Imkan Are Tauba

Shauq Bahraichi

iman ki laghzish ka imkan are tauba

bad-chalni men zahid ka chalan are tauba

uTh kar tiri chaukhaT se ham aur chale jaa.en

england are tauba japan are tauba

hai god ke palon se ab ḳhauf-e-dagha-bazi

ye apne hi bhanjon par bohtan are tauba

insanon ko din din bhar ab khana nahin milta

muddat se farokash hain ramzan are tauba

lillah ḳhabar liije ab qalb-e-shikasta ki

girta hai mohabbat ka dalan are tauba

daman-e-taqaddus par daghon ki faravani

ik maulvi ke ghar men shaitan are tauba

ab ḳhairiyaten sar kari ma.alum nahin hotin

ganjon ko hai naḳhun ka arman are tauba

mashriq pe bhi nazren hain maghrib pe bhi nazren hain

zalim ke taḳhayyul ki lamban are tauba

ai ‘shauq’ na kuchh kahiye halat dil-e-muztar ki

hota hai masiha ko ḳhafqan are tauba