khvab ab husn-e-tasavvur ke ufuq se hain pare
dil ke ik jazba-e-masum ne dekhe the jo khvab
aur taabiron ke tapte hue sahraon men
tishnagi abla-pa shola-ba-kaf mauj-e-sarab
ye to mumkin nahin bachpan ka koi din mil jaae
ya palat aae koi saat-e-nayab-e-shabab
phuut nikle kisi afsurda tabassum se kiran
ya damak utthe kisi dast-e-burida men gulab
aah patthar ki lakiren hain ki yadon ke nuqush
kaun likh sakta hai phir umr-e-guzishta ki kitab
biite lamhat ke soe hue tufanon men
tairte phirte hain phuti hui ankhon ke hubab
tabish-e-rang-e-shafaq atish-e-ru-e-khurshid
mil ke chehre pe sahar aai hai khun-e-ahbab
jaane kis mod pe kis raah men kya biiti hai
kis se mumkin hai tamannaon ke zakhmon ka hisab
astinon ko pukarenge kahan tak aansu
ab to daman ko pakadte hain lahu ke girdab
dekhti phirti hai ek ek munh khamoshi
jaane kya baat hai sharminda hai andaz-e-khitab
dar-ba-dar thokaren khate hue phirte hain saval
aur mujrim ki tarah un se gurezan hai javab
sarkashi phir main tujhe aaj sada deta huun
main tira shair-e-avara o be-bak-o-kharab
phenk phir jazba-e-be-tab ki aalam pe kamand
ek khvab aur bhi ai himmat-e-dushvar-pasand
Leave a Reply