aks koi kisi manzar men na tha
koi bhi chehra kisi dar men na tha
sub.h ik buund ghaTaon men na thi
chand bhi shab ko samundar men na tha
koi jhankar rag-e-gul men na thi
ḳhvab koi kisi patthar men na tha
sham.a raushan kisi khiḌki men na thi
muntazir koi kisi ghar men na tha
koi vahshat bhi mire dil men na thi
koi sauda bhi mire sar men na tha
thi na lazzat suḳhan-e-avval men
za.iqa harf-e-mukarrar men na tha
pyaas ki dhund bhi honTon pe na thi
os ka qatra bhi saghar men na tha
Leave a Reply