hisar-e-zat se nikal ke be-kanar ham hue
zamin-o-asman ka nuqra.i ghubar ham hue
rahi na garmi-e-vafa dilon men ab hain duriyan
suna ke hal-e-dil tumhen jahan men ḳhvar ham hue
pas-e-ghubar-e-a.ina ik aks tum pe baar tha
bas ek zarb tum ne di to be-shumar ham hue
mili jo agahi hamen rida-e-nur men Dhale
falak ki kahkashaon ke bhi tajdar ham hue
muḳhalifat ki andhiyan qadam na Dagmaga sakin
ufuq se misl-e-aftab ashkar ham hue
mohabbaten mahak uThin ḳhafi tha jo ayaan hua
mili hain shohraten unhen jo ishtihar ham hue
ajab si ulfaten rahin ajiib fasle rahe
na qurbaten baham rahin na rad hi yaar ham hue
Leave a Reply