Ham-Zad Hai Gham Apna Shadan Kise Kahte Hain

ham-zad hai gham apna shadan kise kahte hain

vaqif nahin ishrat ka saman kise kahte hain

bimar-e-mohabbat hain ham tarik-e-rahat hain

na-vaqif-e-sehat hain darman kise kahte hain

muddat se ye saman hai tan shoala-e-uryan hai

kya chiiz gareban hai daman kise kahte hain

mathe pe pasina hai qudrat ka tamasha hai

taron ki jhamak kya hai afshan kise kahte hain

dil de ke jafa sahiye aafat men phanse rahiye

daana jo hamen kahiye nadan kise kahte hain

jab yaar ne dekha hai ik zakhm lagaya hai

sau tiron ka dasta hai mizhgan kise kahte hain

us turk ki palkon se mahfuz khuda rakkhe

bar katte hain tiron ki paikan kise kahte hain

dil ki jo zaraat hai khar-o-khas-e-zahmat se

ik qatre ki hasrat hai baran kise kahte hain

sach kahte hain ye zirak hai ishq-e-junun be-shak

vaqif na the ham gul tak zindan kise kahte hain

har-vaqt hai be-zari har dam hai jafakari

dil-jui-o-dildari-e-janan kise kahte hain

rukhsar ka shaida huun kya gul ko samajhta huun

mahv-e-khat-e-zeba huun raihan kise kahte hain

muddat se hai dil barham sohbat se nahin mahram

azad hain ghar se ham mehman kise kahte hain

jaate hain kabhi dargah shivale men bhi hai raah

mazhab se nahin agah iman kise kahte hain

haidar se tavalla hai rahmat ka bharosa hai

ai ‘bahr’ khata kya hai isyan kise kahte hain

Leave a Comment