Avinash Pandey
ankhon se jin ki ashk nikalte nahin vo log
rone lagen agar to sambhalte nahin vo log
vo log jin se dard ka rishta tha ustuvar
duniya badal ga.i hai badalte nahin vo log
abad jin ke dam se hue koh aur dasht
kya hota gar gharon se nikalte nahin vo log
vo jin pe chaḌh gaya kabhi dard-o-alam ka rang
bazm-e-tarab ke rang men Dhalte nahin vo log
ushshaq par zamane ka ye jaur ye sitam
hathon men ik kali bhi masalte nahin vo log
ahl-e-qalam se shaah ko hai mas.ala to ye
qissa kahaniyon se bahalte nahin vo log
Leave a Reply