Razi Akhtar Shauq
aa.e ham shahr-e-ghazal men to is aghaz ke saath
muddaton raqs kiya hafiz-e-shiraz ke saath
avval-e-ishq hai aur ham-safari ki lazzat
aur ahista qadam aur zara naaz ke saath
avval avval to dhanak ban ke uḌa vo taa.ir
aur phir rang badalte ga.e parvaz ke saath
ek viran dariche pe ḳhizan ki barish
koi tasvir banati rahi avaz ke saath
main vo sarshar ki tha nashsha-e-yak-ḳhvab bahut
is ne ta.abir bhi di ḳhvab ke aghaz ke saath
hai koi vaqif-e-asrar sar-e-mai-ḳhana
kya ye miina se surahi ne kaha raaz ke saath
ham ne hi dil se ham-ahang gulu ko rakkha
log lai apni badalte rahe har saaz ke saath
Leave a Reply