Kunwar Mahendra Singh Bedi Sahar
abhi vo kamsin ubhar raha hai abhi hai us par shabab aadha
abhi jigar men ḳhalish hai aadhi abhi hai mujh par itaab aadha
hijab o jalve ki kashmakash men uThaya us ne naqab aadha
idhar huvaida sahab aadha udhar ayaan mahtab aadha
mire saval-e-visal par tum nazar jhuka kar khaḌe hue ho
tumhin batao ye baat kya hai saval puura javab aadha
lapak ke mujh ko gale lagaya ḳhuda ki rahmat ne roz-e-mahshar
abhi sunaya tha mohtasib ne mire gunah ka hisab aadha
baja ki ab baal to siyah hain magar badan men sakat nahin hai
shabab laaya ḳhizab lekin ḳhizab laaya shabab aadha
laga ke laase pe le ke aaya huun shaiḳh sahab ko mai-kade tak
agar ye do ghonT aaj pi len milega mujh ko savab aadha
kabhi sitam hai kabhi karam hai kabhi tavajjoh kabhi taghaful
ye saaf zahir hai mujh pe ab tak hua huun main kamyab aadha
kisi ki chashm-e-surur aavar se ashk aariz pe Dhal raha hai
agar shu.ur-e-nazar hai dekho sharab aadhi gulab aadha
purane vaqton ke log ḳhush hain magar taraqqi pasand ḳhamosh
tiri ghazal ne kiya hai barpa ‘sahar’ abhi inqilab aadha
Leave a Reply