TukḌe TukḌe jab baT ja.un shaam ga.e
din ka saara qarz chuka.un shaam ga.e
ghar se chalte main ne aksar socha hai
shayad hi main luuT ke aa.uun shaam ga.e
saara din is uljhan hi men biit gaya
kaise apna dil bahla.un shaam ga.e
dhuup ke maare logon ko bhi sahra men
mil jaati hai peḌ ki chhanv shaam ga.e
kis kandhe par ashk baha.un shaam ga.e
kis ko apne zaḳhm dikha.un shaam ga.e
par phaila.e murgha bola mir-‘ayaz’
jaaga mere man ka gaanv shaam ga.e
Leave a Reply