safar hai dhuup ka aur saath saa.e rakhti huun
kisi ki yaad ko dil men chhupa.e rakhti huun
mira ḳhayal to koi badal nahin sakta
jo raa.e rakhti huun bas ek raa.e rakhti huun
hava ho kitni hi sarkash faza ho yaḳh-basta
main apne dil ka alaav jala.e rakhti huun
udaas main kabhi tanha.iyon men bhi na rahi
tire ḳhayal ki mahfil saja.e rakhti huun
ye mumkinat men shamil hai vo palaT aa.e
hamesha dil ki ye ḳhali sara.e rakhti huun
Leave a Reply