Maqsood Anwar Maqsood
buzdil ya mazlum jahan men kahlane se kya hoga
TuuTi hi shamshir nikalo Dar jaane se kya hoga
kab tak ye taqdir ka rona aao kuchh tadbir karen
aankh men aansu chak-e-gareban darshane se kya hoga
bhuke ki tum bhuuk miTao to phir koi baat bane
shish-mahal ke ḳhvab sunahre dikhlane se kya hoga
dharti par sukh chain ki ḳhatir man ke mail ko saaf karo
ganga jal men jism ko apne nahlane se kya hoga
ilm-o-hunar ko kaam men laao mustaqbil ki fikr karo
haal men maazi ki bhulon par pachhtane se kya hoga
maar ke Thokar rusva.i ko haq apna le lo ‘maqsud’
bech ke ghairat jam-e-muravvat chhalkane se kya hoga
Leave a Reply