ghazal men jaan paḌi guftugu men phuul khile
miri nava se dayar-e-numu men phuul khile
mire hi sher uchhale mire harifon ne
mire tufail zaban-e-adu men phuul khile
unhen ye zom ki be-sud hai sada-e-suḳhan
hamen ye zid ki isi hao-hu men phuul khile
ye kis ko yaad kiya ruuh ki zarurat ne
ye kis ke naam se mere lahu men phuul khile
bahar ab ke na Thahri kisi bhi qarye men
na bagh-e-ḳhvab na sahra-e-hu men phuul khile
zamin-e-kufa ko yuun hi ḳharab rahna tha
to kis liye ye sinan-o-gulu men phuul khile
mire junun se pas-e-dasht-e-jan ghubar uTha
mire lahu se dar-e-ru-ba-ru men phuul khile
kabhi kamand koi mauj Daal de ‘arshad’
kabhi hava-e-sar-e-abju men phuul khile
Leave a Reply