Ek Zara Si Chah Mein Jis Rose Bik Jata Hun Main

Alok Yadav

ik zara si chaah men jis roz bik jaata huun main

aa.ine ke samne us din nahin aata huun main

ranj gham us se chhupata huun main apne laakh par

paḌh hi leta hai vo chehra phir bhi jhuTlata huun main

qarz kya laaya main ḳhushiyan zindagi se ek din

roz karti hai taqaza aur jhunjhlata huun main

hausla to dekhiye mera ghazal ki khoj men

apne hi siine men ḳhanjar sa utar jaata huun main

de saza-e-maut ya phir baḳhsh de tu zindagi

kashmakash se yaar teri saḳht ghabrata huun main

maun vo paḌhta nahin aur shabd bhi sunta nahin

jo bhi kahna chahta huun kah nahin paata huun main

ḳhvab sach karne chala tha gaanv se main shahr ko

niind bhi kho kar yahan ‘alok’ pachhtata huun main