hue jab se mohabbat-ashna ham
nahin laate zaban par mudda.a ham
sa.adat hai jo ban jaa.en jahan men
kisi majbur dil ka aasra ham
chala.e tiir chhup-chhup kar jinhon ne
karenge un ke haq men bhi dua ham
miTega dagh-e-sajda kab jabin se
ḳhuda jaane banenge kab ḳhuda ham
hamare darmiyan kyuun fasle hain
kabhi socha na ham ne mil ke baham
ḳhamoshi maslak-e-sahab-dilan hai
kisi ko bhi nahin kahte bura ham
hamari ruuh naghma-ḳhvan rahegi
fana ho kar nahin honge fana ham
hamen hai e’timad apni vafa par
nahin karte kisi ka bhi gila ham
zamana-saz nikle tum to kya hai
zara si baat ko kya den hava ham
agar izzat na di ahl-e-haram ne
uTha la.enge apna boriya ham
tasavvur bhi nahin baaqi ḳhushi ka
gham-e-duniya men yuun hain mubtala ham
musalsal ḳhamushi ke ba.ad ‘rif.at’
sar-e-maqtal hue hain lab-kusha ham
Leave a Reply